അഭിഷേക് ശര്‍മ, സഞ്ജു സാംസണ്‍ എന്നീ സ്ഥിരതയുള്ള ഓപ്പണിങ് ജോഡിയെ ഇന്ത്യ പിന്തുണയ്ക്കുന്നതിനാല്‍ 15-കാരനായ വൈഭവ് സൂര്യവംശിക്ക് ടി20 ടീമില്‍ തന്റെ സ്ഥാനം ഉറപ്പിക്കാന്‍ വലിയ പോരാട്ടം തന്നെയാണ് നടത്തേണ്ടി വരുന്നത്. അഭിഷേകിന്റെ സ്ഥാനം ഒരിക്കലും ചോദ്യം ചെയ്യപ്പെട്ടിട്ടില്ലെങ്കിലും, അത്ഭുതകരമായ ഷോട്ട്-മേക്കിംഗ് കൊണ്ട് ക്രിക്കറ്റ് ലോകത്തെ വിസ്മയിപ്പിച്ച ഈ കുട്ടി പ്രതിഭയ്ക്ക് മുന്നില്‍ സഞ്ജുവിന് പലപ്പോഴും സ്ഥാനം നഷ്ടമായിരുന്നു. എന്നാല്‍ അടുത്ത കാലത്തായി, 2026 ടി20 ലോകകപ്പിലെ പ്ലെയര്‍ ഓഫ് ദി ടൂര്‍ണമെന്റായ സഞ്ജുവിനെ തന്നെയാണ് ടീം മാനേജ്മെന്റ് പിന്തുണയ്ക്കുന്നത്. ഇതിന്റെ ഫലമായി സൂര്യവംശി ബെഞ്ചിലിരിക്കുകയും, മറ്റേതെങ്കിലും താരം ലഭ്യമാകാതെ വരുമ്പോള്‍ മാത്രം അവസരം ലഭിക്കുകയും ചെയ്യുന്ന അവസ്ഥയാണുള്ളത്.
വലത് തുടയിലെ പേശിക്കേറ്റ പരിക്കിനെ തുടര്‍ന്ന് ഇഷാന്‍ കിഷന് ന്യൂസീലന്‍ഡിനെതിരായ രണ്ടാം മത്സരം നഷ്ടമായിരുന്നു. മൂന്നാം മത്സരത്തിലും അദ്ദേഹത്തിന് കളിക്കാന്‍ സാധിക്കില്ല. രണ്ടാം മത്സരത്തിനുള്ള പ്ലെയിംഗ് ഇലവനില്‍ ഇന്ത്യ സൂര്യവംശിയെ ഉള്‍പ്പെടുത്തിയെങ്കിലും മൂന്നാം നമ്പറിലാണ് താരത്തെ ബാറ്റ് ചെയ്യാന്‍ അയച്ചത്. എന്നാല്‍ എക്സ്ട്രാ കവറില്‍ ഫീല്‍ഡര്‍ക്ക് ക്യാച്ച് നല്‍കി മടങ്ങുന്നതിന് മുമ്പ് 8 പന്തില്‍ നിന്ന് 4 റണ്‍സ് മാത്രമാണ് ഈ ഇടങ്കയ്യന്‍ ബാറ്റര്‍ക്ക് നേടാനായത്.
ഇന്ത്യയുടെ പരീക്ഷണം പാളിപ്പോയോ?ഒരു ഒറ്റ ഇന്നിംഗ്‌സ് മാത്രം വെച്ച് ടീം മാനേജ്മെന്റ് നടത്തുന്ന പരീക്ഷണത്തിന്റെ വിജയപരാജയങ്ങള്‍ നിര്‍ണ്ണയിക്കാനാവില്ലെങ്കിലും, ഇത് വലിയൊരു ചര്‍ച്ചയ്ക്ക് വഴിതുറക്കുന്നുണ്ട്. സൂര്യവംശിയുടെ ബാറ്റിംഗ് പൊസിഷന്‍ മാറ്റിയത് ശരിയായ തീരുമാനമായിരുന്നോ എന്ന്. ഇന്നിംഗ്‌സ് ഓപ്പണ്‍ ചെയ്യുമ്പോള്‍ എതിര്‍ ബോളര്‍മാര്‍ക്ക് എന്നും വലിയ ഭീഷണിയായിരുന്നു ഈ 15-കാരന്‍. ഒരു ഇന്ത്യന്‍ താരം നേടുന്ന ഏറ്റവും വേഗമേറിയ ഐപിഎല്‍ സെഞ്ചുറിയാകട്ടെ (35 പന്തില്‍), 2026 അണ്ടര്‍-19 ലോകകപ്പ് ഫൈനലില്‍ നേടിയ അവിശ്വസനീയമായ 175 റണ്‍സ് (80 പന്തില്‍) ആകട്ടെ, സൂര്യവംശിയുടെ എല്ലാ ഉജ്ജ്വല ഇന്നിംഗ്‌സുകളും പിറന്നത് ഓപ്പണറുടെ റോളിലായിരുന്നു.
ആക്രമിച്ചു കളിക്കാനുള്ള ഈ കൗമാരക്കാരന്റെ കഴിവ് പരിഗണിക്കുമ്പോള്‍, പവര്‍പ്ലേയിലാണ് അദ്ദേഹത്തിന്റെ കഴിവ് ഏറ്റവും മികച്ച രീതിയില്‍ പ്രയോജനപ്പെടുത്താന്‍ സാധിക്കുക. പവര്‍പ്ലേയില്‍ ലോകത്തിലെ ഏറ്റവും മികച്ച ബോളര്‍മാര്‍ക്ക് പോലും ഒരു പേടിസ്വപ്നമാണ് സൂര്യവംശി. എന്നാല്‍, ന്യൂസിലാന്‍ഡിനെതിരായ രണ്ടാം ടി20യില്‍ സഞ്ജുവിനെയും അഭിഷേകിനെയും തന്നെ ഓപ്പണര്‍മാരായി നിലനിര്‍ത്താനും സൂര്യവംശിയെ മൂന്നാം നമ്പറിലേക്ക് അയക്കാനുമാണ് ഇന്ത്യന്‍ ടീം മാനേജ്മെന്റ് തീരുമാനിച്ചത്.
മുന്‍ താരങ്ങളുടെ വിമര്‍ശനംപരിചയസമ്പന്നനായ സഞ്ജു സാംസണെ മൂന്നാം നമ്പറിലേക്ക് മാറ്റണമായിരുന്നു എന്നാണ് മുന്‍ ഇന്ത്യന്‍ താരങ്ങളായ മുരളി കാര്‍ത്തികും രവിചന്ദ്രന്‍ അശ്വിനും അഭിപ്രായപ്പെട്ടത്. സൂര്യവംശി അഭിഷേകിനൊപ്പം ഓപ്പണ്‍ ചെയ്യുകയും സഞ്ജു വണ്‍-ഡൗണായി ഇറങ്ങുകയും ചെയ്ത 2026 ഏഷ്യന്‍ ഗെയിംസിലെ ഉദാഹരണമാണ് ഇതിനായി ചൂണ്ടിക്കാണിക്കപ്പെടുന്നത്. 'മത്സരം തുടങ്ങുന്നതിന് മുമ്പ് തന്നെ, പ്രത്യേകിച്ച് നമ്മള്‍ ബാറ്റ് ചെയ്യുന്നതിന് മുമ്പ് ഞാന്‍ ഇത് ആവര്‍ത്തിച്ച് പറയുന്നുണ്ടായിരുന്നു. വൈഭവ് സൂര്യവംശിയെ കളിപ്പിക്കുമ്പോള്‍, അവന്‍ എവിടെ കളിക്കുമ്പോഴാണ് ഏറ്റവും മികച്ചവന്‍? ഓപ്പണര്‍ എന്ന നിലയിലാണ് അവന്‍ മിടുക്കന്‍. എന്നാല്‍ നിങ്ങള്‍ അവനെ മിഡില്‍ ഓര്‍ഡറിലേക്ക് മാറ്റി. അവന്‍ അവിടെ ഇതുവരെ കളിച്ചിട്ടില്ല, കളിക്കാന്‍ പഠിച്ചുവരുന്ന കുട്ടിയാണ് അവന്‍. ഒറ്റ രീതിയില്‍ മാത്രമേ അവന്‍ ബാറ്റ് ചെയ്തിട്ടുള്ളൂ. വ്യത്യസ്ത റോളുകള്‍ കൈകാര്യം ചെയ്യാന്‍ സാധിക്കുന്ന അനുഭവസമ്പന്നരായ കളിക്കാര്‍ ടീമിലുള്ളത് ഇങ്ങനെയുള്ള സാഹചര്യങ്ങളിലാണ്' -മുരളി കാര്‍ത്തിക് അഭിപ്രായപ്പെട്ടു.
'അവന്‍ ഒട്ടും പരിചയമില്ലാത്ത ഒരു സ്ഥാനത്ത് പെട്ടുപോയതുപോലെയാണ് എനിക്ക് തോന്നിയത്. ആറാം ഓവറില്‍ ബാറ്റ് ചെയ്യാന്‍ ഇറങ്ങുക എന്നത് അവന്റെ രീതിയല്ല. ഇതിനുമുമ്പ് അവര്‍ ഈ കോമ്പിനേഷന്‍ പരീക്ഷിച്ചപ്പോള്‍ സഞ്ജു മൂന്നാം നമ്പറിലേക്ക് മാറിയിട്ടുണ്ടായിരുന്നു. ഈ കോമ്പിനേഷനിലാണ് പോകുന്നതെങ്കില്‍ വൈഭവ് മൂന്നാം നമ്പറില്‍ കളിക്കേണ്ടതായിരുന്നു എന്ന് എനിക്ക് ഉറപ്പില്ല, എങ്കിലും അത് സംഭവിച്ചു. ഇന്ന് വൈഭവിന് അത് മുതലാക്കാന്‍ കഴിഞ്ഞില്ല' -അശ്വിന്‍ പറഞ്ഞു.
എന്തുകൊണ്ട് ഓപ്പണിങ്ഓപ്പണിങ് സഖ്യത്തെ മാറ്റാതെ സൂര്യവംശിയെ മൂന്നാം നമ്പറിലിറക്കാനുള്ള ഇന്ത്യയുടെ തീരുമാനത്തിന് പിന്നില്‍ കൃത്യമായ തന്ത്രപരമായ കാരണങ്ങളുണ്ടെങ്കിലും, അത് ഈ യുവതാരത്തിന്റെ പ്രതിഭയെ പൂര്‍ണ്ണമായി ഉപയോഗപ്പെടുത്തുന്ന ഒന്നല്ല. മൂന്നാം നമ്പറിലിറങ്ങുമ്പോള്‍ മത്സര സാഹചര്യത്തിനനുസരിച്ച് ബാറ്റ് ചെയ്യേണ്ടി വരും. ഇത് അദ്ദേഹത്തിന്റെ തനതായ സ്വതന്ത്രമായ ബാറ്റിംഗ് ശൈലിയെ നിയന്ത്രിച്ചേക്കാം. കൂടാതെ, ഓപ്പണര്‍മാര്‍ വലിയൊരു കൂട്ടുകെട്ട് പടുത്തുയര്‍ത്തുകയാണെങ്കില്‍, ആദ്യ ആറ് ഓവറുകളില്‍ സൂര്യവംശിക്ക് കാര്യമായ പങ്കൊന്നും വഹിക്കാന്‍ സാധിച്ചെന്നു വരില്ല. ടീമിന്റെ കാഴ്ചപ്പാടില്‍ നോക്കിയാലും, ഓപ്പണ്‍ ചെയ്യുകയും സ്വന്തം ശൈലിയില്‍ കളി നിയന്ത്രിക്കുകയും ചെയ്യുമ്പോഴാണ് സൂര്യവംശിയുടെ ആക്രമണകാരിയായ ബാറ്റിംഗിന്റെ പരമാവധി ആനുകൂല്യം ടീമിന് ലഭിക്കുന്നത്. രണ്ടാം ടി20 ഇന്ത്യ ജയിച്ചുവെങ്കിലും, ഈ പരീക്ഷണത്തെക്കുറിച്ചുള്ള ചര്‍ച്ചകള്‍ സജീവമായി തന്നെ നില്‍ക്കുന്നു. ഇഷാന്‍ കിഷന് അടുത്ത മത്സരത്തിലും കളിക്കില്ലെന്നിരിക്കെ, രണ്ടാം മത്സരത്തിലെ അതേ ബാറ്റിംഗ് കോമ്പിനേഷന്‍ തന്നെ ഇന്ത്യ തുടരുമോ എന്ന് കാണുന്നത് കൗതുകകരമായിരിക്കും.
content highlights: Did Team India Make a Tactical Error by Batting Vaibhav Suryavanshi at No. 3?